УЛЗ САВ НУТГИЙН МАТЕМАТИКИЙН УЛАМЖЛАЛТ ОЛИМПИАД

 Идэр залуу насныхаа эрдэм оюуны аархлаар

Ижил ариун мөрөөдлийнхөө эрчим хүчийг бадрааж

Ихэр яруухан үзлээр математикийн сайхныг бишрээд

Итгэл дулаан зүтгэлээр ууган олимпиадыг зохиосон

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

ГУЧИН ЖИЛДЭЭ ДАМЖИН

БУМАН ҮЙЛСИЙГ ТҮГЭЭСЭЭР

Тоо бодохуйн шимийг утгын чанадад хадгалсаныг

Тооцон хэмжихүйн чанарыг цөөн алхмаар тодруулсаныг

Тойрог дугуйн ялгааг багтан багтааж дүрсэлснийг

Тоочин хүмүүний тархинаас бадарч задарсан ухааныг

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАДААР

УУДАМ ДОРНЫН ТАЛДАА

УРАМТАЙ ШАВЬ НАР НЬ СУРАЛЦСААР

Улз нутгийн аялгаар альфа хэмээн дуудсан

Урт тоон дарааллын зүй тогтлоор гангарсан

Уян сэтгэлийн радиусаар бөмбөрцөг дүүргэн дуулсан

Усан долгион хэмнэх синусын хуулиар нотолж

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАДААР

УЛС МОНГОЛДОО АЛДАРТАЙ

УХААНТ ШАВЬ НАР НЬ ТОДОРСООР

Тансаг мэдрэхүйн заагаас гүн хайгуулын увидас

Тангенс шугамын өсөлтөөр мөнхийн зүгт тэмүүлсэн

Тархан алсрах цувааны нийлэн сарнихын учир

Тасралтгүй функцийн экстремум нугаралтын цэгт тохиосон

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАДААР

УРАН БОДОЛТ ТЭРЛЭСЭН

ОЛОН НАМТРЫГ ТУУРВИСААР

Алтан гадсаа тойрсон шанаган оддын эргэлтээр

Аглаг ертөнцөд тодроогүй долоон далд нууцаас

Абсолют хэмжээгээр төөлөн эерэг зайг дүүргээд

Алтан харьцаа зонхилсон гоо үзэсгэлэнг тайлаад

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

УУРАГ ТАРХИНД ГЭРЭЛТСЭН

ОЮУН ЦЭНГЭЛИЙГ ДЭВЖЭЭСЭЭР

Гравитац нэгэн орчлонгийн татахуйн хүчийг томъёолон

Гарцаагүй үнэн үзэгдлийн ирэх магадлалыг тоочин

Бодис зүй хувилахуйн урвалын чанарт нэвтрэн

Босго өндөр нууцыг математикийн хэлээр өгүүлэн

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

УУЖИМ ХОРВООД ТАРХСАН

ТҮМЭН УЧРЫГ ЗАНГИДСААР

Гэрлийн жил туйлдмаар үүрдийн холыг ойртуулж

Гэгэлзэн лугших зүрхний хэмнэл графикийг уншаад

Хар цагаан сүлэлдсэн буурал түүхийг сэдрээж

Хас тамгаар бүтээсэн түмэн настыг тэлээд

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

УХААНТ ХҮМҮҮНИЙ ХҮЧИЙГ

ИРЭЭДҮЙН ЗҮГТ ТҮГЭЭСЭЭР

Хуучин шинэ таамаглал мөргөлдөн өрсөх цагаас

Хуурмаг комплекс талбарт тэмцэн дайтах ахуйн

Худал бодитыг ялгасан ангилал төгсийг эхлүүлж

Хуулиар захирах таалал эвлэрэн эмхлэн цогцлоосоныг

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

УРГАН МАНДАХ СЭТГЭХҮЙД

ХУВЬСАГЧИЙН УТГЫГ МЭДРҮҮЛСЭЭР

Дагуурын цэнхэр талын Данзангийн Нямсүрэн ахайн

Даллаж зохиосон аялгууг нээлтэн дээрээ дуулдаг

Тооны олимпиад нэртэй сүлд дуугаараа эгшиглэсэн

Тоочин хүүхдүүдийн өлгий Дорнын талдаа дуурсаад

УЛЗ САВ НУТГИЙН

МАТЕМАТИКИЙН УЛАМЖЛАЛТ ОЛИМПИАД

УРТЫН УРТЫГ ЗАМНААД

САЙН САЙХНЫГ МӨНХӨЛСӨӨР...

Ц.Батболд

2021 оны 11 сарын 03 Наранбулаг