ГЕОМЕТРЭЭР ГОЁХУЙ..

               ГЕОМЕТРЭЭР ГОЁХУЙ

Ертөнцийн гоо сайхан далд нуугдсан эринд

Евклид геометрийнхээ үүд хаалгыг тайлаад

Ерөөл дүүрэн үнэн цэг шулуун хавтгайгаа

Ердийн мухар сүсгийг зад татан туурвижээ

Эхлэл төгсгөл алдарсан зүүдэн хорвоог доргиож

Элемент тодорхой зохиол мөнхийн зайг эзлээд

Эмх цэгцтэй дүрсүүдийн хэмжээс оршихуйн шалтгааныг

Эрэмбэ дараатай аксиомолж хязгаар давах ирээдүй рүү

Хоёрхон цэгийг дайруулсан ганцхан шулуун оршихыг

Хосолсон гурвалыг агуулж нэг л хавтгай олдохыг

Хорвоо бүтэн бүхлээрээ цэгүүдээр дүүрсэн учрыг

Хотол хүмүүн ертөнцийд таниулж өгүүлсэн түүхтэй

Дүрс биетийн агууламж хүний мэдрэхүйг тэмтэрч

Дүрэлзсэн оюуныг өдөөсөн ухаан өрдөн шатааж

Пифагор өвөө шаналж теорем хэлж батлаад

Пи тооны үүсгүүр нууцын чанадаас өндийсөн

Хэрчим цацраг вектор тоо чиглэлийг ялгаж

Хэзээ хэрхэн хугацаанаас үл хамааран байрших

Хэдэн хэмжээст огторгуйд цэг тоолон зааж

Декарт авхайн дүрсэлсэн бүтэн координатын систем

Дедукц индукцээр тодруулж задлан нэгтгэсэн намтартай

Тахир шугамыг ангилж муруй зурааснаас холдуулан

Тав арван өнцөгтийг хэрхэн холбохыг сэхээрүүлж

Тал талс талстын зааг нэрийг тоймлон

Ташуу эгц параллелийг солбицон зөрөхийг үзүүлээд

Тааран огтлох цэгийг тэртээ холоос олоод

Таалан болгоох хэрчмийг зангилаа цэгээр холбожээ

Тойрог дугуй хоёрын урт талбайг томьёолон

Төв өнцөг нумаар хөвч сектор сегментийн

Туулсан будагдсан хэсгийг радиан градус нэгжээр

Тулсан багтсан өнцгийг онцолж хэлсэн нь агуу

Хавтгай хавтгайн байршлаас стерео ертөнцийн чанад руу

Хамаг сэрэхүйг уудлан куб призм пирамидаар

Хашигдсан орон зайг тасдан үүсгэх эзэлхүүнийг

Хатуу биетийн хувьд гурван хэмжээсээр тодорхойлжээ

Хагас тойргийн диаметрийг бүтэн эргүүлж бөмбөлөг

Хажуу катетийг тойруулан конус буй болоод

Харин өргөнөө бэхлээд цилиндр эргэж үүсгээд

Хавтгай зүсэлтийн үрээр огтлогдсон биетийг хараад

Огторгуйн найман мөчид нарийн координатаар байршуулж

Олон биетүүд биендээ багтаж багтсаныг судалж

Огтлол дүрсийг салгаад планимерт шилжүүлэн

Оргил теорем ашиглан нэгж тоолон хэмжиж дээ

Тригонометрийн утгуудын нандин чанарыг хараад

Тэлж агшихын зайг тод томруун дүрслээд

Тэмдэг мөчийн ялгааг өнцөг тоолон мэдрээд

Тэнцүү төсөөтэйн логикоор бүхнийг тооцсон Геометр...

Гео гоё хэмээн уулга алдсан шавь нартаа

Гэрэлт орчлонд нэвтэрсэн гоо сайхны босгонд

Гэгээн оюунаараа гангарч шимтэн сурахын шидийг

Гэтэлсэн эрин үеүдийн шинжлэх чигийг баримталмой

Аяа, бидний мэдрэх уужим түмэн далдхан

Асар ертөнцийн нууцыг уудлан хайн сэтгэх

Амьдрал тээсэн насны минь жаргал цацарсан оршихуй

Амгалан тэнгэрийн орчилд зүүд биелэхүйн шалтгаан билээ...

2021.04.19 Ц.Батболд